คำ :องอาจ สิงห์สุวรรณ
ภาพ: ประยูร หงษาธร

เดือนนั้น ขูหล่นแล้ว พวงดอกจานนา
ดอกคูนเหลือง แต่งโตเต็มดั้ว
บุญเดือนห้า กลองโฮมหลวงพ่อ
ตีป่าวต้อน สรงน้ำหน่อธรรม

เมฆเอ้ย ดำดื่นฟ้า มวลเมฆมุมหมอง
แสงเคยใส มืดลงทังเค้า
แลงงายเซ้า พิงเสา นอนเส่า
ปลาแดกน้อย ตาปิ้นเป่าแปน

ย้อนว่า ฝืนลึดข้าว มันบ่ลงคอ
เงยแนมทาง บ่มีมาจ้อย
เสียงกรายใกล้ ไผมากรายผ่าน
เทียวลุกล้ม หมาน้อยจ่อยเหลือง

ลูกหล้า คือมิดจ้อย ทางอ่วยคืนเมือ
เฮือนลุงใส ฟักสันเทิงซิ้น
หอมแกงต้ม ลอยลมตางต่อน
ปลาแดกน้อย หลอนจ้ำลึดนำ

ลึดลง ตาหน่วยน้ำ โฮมอั่งเฮือนซาน
เงาสองเงา นั่งเฮียงฮือก้ม
หวังเห็นหน้า ซินปีละเทื่อ
ดำอุ้มหลุ้ม เป็นก้อนจ่องใจ คักแท้

หล่าคำ ปีใหม่พ้น เลยตรุษสงกรานต์
ออกพรรษา เบิดปีคองเจ้า
ยอมือป้าย นัยนาพังหน่วย
คุณพระพร้อม นำตุ้มต่อมตาม แนเดอ.